Gewürztraminer, die kultureel verwarde druif!

Sodra mens daarin geslaag het om sy tongknopende Duitse naam uit te spreek, vind jy dat gewürztraminer eintlik ’n verrassend sagmoedige, hedonistiese wyn is. Gewürztraminer kan vertaal word as “speseryagtige tramin”, maar dis ’n klassieke geval van “lost in translation” aangesien daar niks speseryagtig aan gewürztraminer is nie, dis eerder aromaties. Wonderlik aromaties, en net so ’n bietjie dekadent!

 

Gewürztraminer is heelwaarskynlik die mees aromatiese druif met sy kenmerkende geure van lietsji en roosblare. Met so ’n geurprofiel is dit eintlik verbasend dat daar so min gewürztraminer in die wêreld gemaak word. Vir elke gewürztraminer-wingerdstok is daar glo 30 stokke cabernet sauvignon en 4 stokke riesling.

 

Een uit Neethlingshof se kelder.

Italiaans in oorsprong, faam in Frankryk, maar Duits in naam, is gewürztraminer gerelegeer tot sogenaamde niskultivarstatus as gevolg van sy kulturele erfenis. Sy storie het in die Middeleeue in Italië se Suid-Tirol in ’n klein dorpie met die naam Tramin begin, om en by 1145 AD. Tramin was ’n wynstreek nog voor daar begin is om die geskiedenis te boekstaaf en het reeds wyn in houttenks gestoor toe die Romeine sowat 2 000 jaar gelede oorgeneem het. Daar is heelwat meningsverskil oor wie eintlik gewürztraminer se “ouers” is, traminer of savagnin blanc (niks met sauvignon blanc te doen nie). Aangesien Suid-Tirol die voorste linie was in etlike Europese oorloë en na die Romeine in 570 AD deur die Beiers bewoon is, en toe in 1363 deel van Oostenryk geword het, net om na die Eerste Wêreldoorlog aan Italië oorhandig te word, is dit geensins verrassend dat sekere wingerdstokke verkeerde name gekry het in al die herrangskikking van die grens nie. Tot vandag praat

Hierdie een kom uit die kelder van Paul Cluver Wines.

70% van Tramin se inwoners steeds Duits en word wyn-etikette in sowel Duits as Italiaans geskryf!

 

Ongeag sy twyfelagtige herkoms het traminer en savagnin blanc gemuteer en ’n hoogs aromatiese druif met ’n pienk dop geword. Die Franse noem dit Traminer Musque, die Duitsers  Roter Traminer en die Italianers Traminer Rosé.

 

Gretig om die wêreld te sien, het traminer al langs die Ryn-rivier af na Alsace “gereis” en onderweg die voorvoegsel gewurz  in 1870 gekry (sonder die umlaut op die “u”, miskien omdat die Franse die Duitsers wou afjak). Tog is die naam “gewürztraminer” eers amptelik in 1973 erken. Dit was dan ook in Alsace dat gewürztraminer sy grootste sukses en faam behaal het.

 

Gewürztraminer het na baie ander Europese lande versprei en sowel byval as byname gevind. Dit het Mala Dinka in Bulgarye geword; Drumin, Pinat Cervena of Livora in die Tsjeggiese Republiek; Tramini in Hongarye en Rusa in Romenië.

 

Die druifsoort het maar redelik onlangs sy verskyning in Suid-Afrika gemaak en eers in die 70s hier aangeland. Hoewel die Franse die grootste sukses met die druif behaal, is Gewürztraminer beslis gemaak vir iemand met ’n meer “wêreldwye” smaak, die sogenaamde “more educated palate”.

 

As jy nog nie Gewürtztraminer ontdek en verken het nie, is dit nie tyd dat jy jou repertoire uitbrei en dit die volgende been van jou wynreis van ontdekking maak nie?

 

Tjorts!

 

EINDE

 

 

 

 

 

Leave a Reply

Your email address will not be published. Required fields are marked *

You may use these HTML tags and attributes:

<a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>