Kry ‘n heerlike smaak van Le Good Life wanneer Die Huis van J.C. Le Roux, Suid-Afrika se toonaangewende vonkelwyntuiste, sy deure op 3 Desember heropen met ‘n glansryke nuwe voorkoms, net betyds vir die feesseisoen.
Ná dié stylvolle opknapping van vier maande, wat letterlik die dak gelig het, kan besoekers hul gunsteling-proeë weer geniet saam met splinternuwe sjiek bykomstighede.
Die gesellige nuwe buite-dek gaan beslis hierdie somer ‘n kuierplek vir vonkelwynliefhebbers wees met genotvolle Cap Classique- en vonkelwynproeë. Proe-ervarings word ook langsaan by die pragtige pienk La Fleurette-kamer aangebied.
Die uiters gewilde vonkelwyn- en malvalekker-, meringue- en nougat-proekombinasies sal hemelse bederf wees, en die goue La Vallée-kamer en elegante Scintilla-sitkamer is die perfekte ontspanplekke om jou te verlustig in bekroonde Cap Classiques, soos die 2012- Amorim Méthode Cap Classique Challenge-wenner, J.C. Le Roux Scintilla 2003.
Die restaurant by Die Huis van J.C. Le Roux sal met sy nuwe voorkoms die kroon span met ‘n pragtige nuwe onderdakterras en fynproewer-braaiplek vir die somer. Heerlike disse sal vir ontbyt en middagete bedien word, en oester- en vonkelwynkombinasies sal ‘n groot trekpleister op die nuwe middagetespyskaart wees.
LINKS: As die foto nie jou mond laat water nie, kort daar iets ernstigs met jou opvoeding!
Besoek Die Huis van J.C. Le Roux dié somer en vier Le Good Life by jou gunsteling-vonkelwynbestemming.
Die Huis van J.C. Le Roux is sewe dae per week oop vanaf 3 Desember 2012. Die restaurant is oop van 09h00 tot 16h00 met ontbyt tussen 09h00 en 11h00 en middagte van 12h00 tot 15h00. Bel 021-865 8200 vir tafelbesprekings, inligting oor keldertoere en proeë, of besoek www.jcleroux.co.za of www.facebook.com/HouseofJCLeroux.
Einde