Afrikaans veg terug teen onprofessionaliteit en beledigings in wynbedryf!

Die jongste bekendstelling van wyne uit die kelder van Stellenbosch Hills het weer eens die onderwerp van Afrikaans in die Suid-Afrikaanse wynbedryf in die kollig geplaas. Beteken Suikerboschrand, ’n Kaapse versnit, en Kastanjeberg, ’n Chenin Blanc, dat daar ’n klein dog duidelike gemaklikheid in die plaaslike wynbedryf ontstaan het om erkenning te gee aan Afrikaans?  Mens kan net hoop en duim vashou.

Hoewel die twee name nie hedendaagse Afrikaans is nie, maar eerder aan Afrikaans/Nederlands herrinner, bevat hulle ’n mate van egtheid en dui op ’n erkenning van “die taal” as goeie bemarking. Hopelik beteken dit ook dat die Suid-Afrikaanse wynbedryf uiteindelik weg begin beweeg van die belaglike en kleinlike kulturele afkeur van jare gelede toe Afrikaans blindelings verwyder is van alles wat met wynbemarking te doene gehad het.

Die Franse, Italianers, Grieke en Turke, byvoorbeeld, het geen probleem om hul taal op etikette te gebruik nie, en niemand hol as gevolg daarvan weg van hul wyne nie. Inteendeel! Die argument oor onder meer begrip en uitspraak is niks anders nie as ’n flou verskoning. In Suid-Afrika het ’n siekte met die naam politieke korrektheid die afgelope 25 – 30 jaar die oorhand gekry. Dis tyd dat “genesing” intree!

Stellenbosch Hills is egter nie die eerste wynprodusent wat bietjie erkenning aan Afrikaans gee nie. Die beste voorbeeld daarvan is Hermanuspietersfontein wat onbeskaamd die Afrikaanse erflating van wyn in Suid-Afrika erken en beklemtoon met hul wynname én –beskrywings in Afrikaans, iets waarvoor hulle heeltemal te min erkenning kry.

Dié voorloper op die gebied van Afrikaans as unieke bemarkingsproposisie wend hierdie wonderlike, beskrywende en unieke taal nie net aan in sy wyne se name nie, maar ook op die etikette. Elke Hermanuspietersfontein-wyn het sowel ’n hoogs idiomatiese naam in Afrikaans én ’n boeiende agterste etiket. Met Afrikaans het hierdie wynmakery ’n “ware storie” geskep in ’n “nywerheid van fabels”.

En dis opvallend dat Afrikaans meer tot sy reg kom by die jonger geslag wynmakers, soos Eben Sadie en sy Ouwingerdreeks en David en Nadia Sadie met hul Plat’bos, ’n Chenin Blanc wat reg laat geskied aan “die taal”, in meer as een opsig.

Maar alles is nog nie maanskyn en rose nie! Daar is steeds wynprodusente – en hul kommunikasiekonsultante – wat Afrikaans afskeep, selfs minag.

Verbeel jou jy werk vir ’n Afrikaanse publikasie en ’n nuusvrystelling kom per vonkpos by jou aan … in Engels! Jy vra vir die Afrikaanse weergawe, en as jy gelukkig is, word daar op jou versoek gereageer. In die meeste gevalle word jou versoek heeltemal geïgnoreer! Onprofessioneel? Beledigend? Swak maniere? Al drie, sê ek.

En as daar wel op jou versoek gereageer word, kry jy ’n klomp flou verskonings hoekom die vrystelling nie in Afrikaans uitgereik word nie. Die gewildste, en swakste, een is:“Daar is nie daarvoor begroot nie.” Regtig? Die wynprodusent kan duisende rande hoes vir ’n Engelse nuusvrystelling, maar nie ’n paar honderd rand uithaal vir ’n Afrikaanse vertaling nie? Kom aan, probeer ’n ander grap.

Wat hierdie uiters onprofessionele en beledigende gedrag erger maak, is die feit dat dit dikwels kom van Afrikaanse wynprodusente of produsente met diep wortels in die Afrikaanse kultuur.

Ter afsluiting, die Suid-Afrikaanse wynbedryf sou baie anders gelyk het sonder die insette van Afrikaners, BAIE anders. Die vraag kan selfs gevra word of daar vandag veel van ’n wynbedryf sou gewees het sonder Afrikaans-sprekendes. Verreweg die meeste wynboere en wynmakers is Afrikaans-sprekend, so word ek vertel, en meer as die helfte van die wyn in Suid-Afrika word deur Afrikaners verbruik.

Kom ons hou duim vas dat Afrikaans sy regmatige plek in die Suid-Afrikaanse wynbedryf kan inneem. Dit sal natuurlik help as wynliefhebbers ook van tyd tot tyd hul stem dik maak oor die miskenning van Afrikaans. En te hel met linkses, liberaliste en rassiste wat hul speelgoed uit die kot wil gooi oor hierdie pragtige taal.

Tjorts!

EINDE

One thought on Afrikaans veg terug teen onprofessionaliteit en beledigings in wynbedryf!

  • Kolskoot vir hierdie raakvat artiekel. So n bek moet jêm kry.
    Alle sukses vir Stellenbosch Hills met bogenoemde nuwe reeks.

Leave a Reply

Your email address will not be published. Required fields are marked *

You may use these HTML tags and attributes:

<a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>